Lunglomh nak

Lunglawmhnak
Pathian nih a sermi thil vialte nih hin anmah le tawk cio in hrih le hram, an chuakkeh ning, an chuahkehnak, umtu colcangh ning tuanbia an nei cio i, cu an tuanbia hna cu an si-ning/ si-nak (identity) an si colh. Minung  chimlo thil sermi vialte; thing le ram, saram vawlei i a tlawnglengmi hna siseh ti chung i a tlawnglengmi hna tiangin an tuanbia hmuhduh le theih duhah mithiam pipi hna cu nihin ni tiang an buai cuahmah ko. Zei catiah cu an tuanbia nihcun an sinak a langh ter i an hmailei thil umtuning ding zong tampi a langhter. Tuanbia a ngeilomi le tuanbia hmuhkhawhlomi thil pauh pauh hi a tlaumi an si i, a umlomi bantuk an si.
Nihin niah vawleicung buaitertu thil pakhat a simi cu Si-nak ifianlonak (identity Crisis) a si i, an sinak an Ifianlonak a ruang cu an tuanbia thatein an i theih lo caah a si. Minung nunnakah sullam a neitukmi le a sung tukmi kan tuanbia hi thlaulotein hmuh le kilven a si khawhnak caah nihinni tiang mi tampi nih phaisa tampi dihin research an tuah i heh chet tiah an colcang.  Mi cheukhat cio bangin Kan nih Dawn zong kan pi le pu hna chan in cathiamlo ruangah siseh, thildang ruangah siseh tuanbia thate i a kilkawimi kan rak si ve lo caah nihinni tiang tuanbia thate i a ngeilomi bantuk kan si. Dawn te le fa lakah tuanbia i theihlonak ruangah a tlau cuahmahmi zong kan um len cang.
Culio caan teah hi bantukin kan fa/nau a simi Salai CSthang nih kan herh tukmi Dawn tuanbia amah i zuamnakte bakin a kan kawlpiakmi kan hmuh tikah kan lunglawmhnak hi kan chim cawk lo. Mino a simi nih a luanciami kum 100 renglo a si cangmi tuanbia tling khitkhette i hmuh le kawl cu a har tak takmi rian a si ko lai. Hi vial a kawl khawhmi le hmuh khawhmi kan zoh tikah kan lung ai lawm tuk i a tuanbia kawlmi ruangah lunglawmhnak lawng siloin hi bantuk bia le hla (Literature) leiah bochanawk tlak mino kan neihmi kan hmuhin kan lung a hmui chin chin. Hi kan Dawn tuanbia a reltu vialte nih hin keimah bantukin thathnemnak tampi nan hmuh cio theu lai tiah ruahchannak zong ka ngei.

Pu Lal Ro Mawi
Melbourne
Australia