Hnam dang JCB dan loa Mizorama awmte November 30 hmaa la chhuak turin hriattir

Hnam dang JCB dan loa Mizorama awmte November 30 hmaa la chhuak turin hriattir

Mizoram Earthmovers' Owners' Union (MEOU) chuan nimin khan Aizawl Press Club-ah thuthar thehdarhtute an kâwm a; hnam dang JCB dan loa Mizorama awmte chu November 30, 2018 hmaa la chhuak vek turin a neitute an hriattir.

MEOU president Lalmuansiamkima chuan, ram leilung fate'n an thawh ve theih reng hnam dang JCB/excavator-te'n dan loa Mizorama an thawk ṭhin chu an vei thu a sawi a, "Ram leilung fate chan tur sum tam tak a luangral a ni. Tun dinhmunah hian Mizoramah hnam dang JCB dan loin 70 vel leh excavator 80 vel a awm a, kum khat chhunga an sum lak luh zawng zawng chu cheng vbc. 34.8 vel a ni," a ti.

September 5, 2018-a MEOU inkhawmpuiah hnam dang kháwl, dan loa Mizorama hna thawkte ûm chhuah vek ni se tiin an lo pass tawh tih sawiin Lalmuansiamkima chuan, "Kan hmalakna tur hi ram hnuk khawih thil a nih avangin Central YMA-te min pui turin kan ngen a, CEC meeting chuan kan ngennate min pawmsak a ni" a ti a; dan loa awm JCB-te chu kumin November 30 hmaa lak chhuah vek tur tih chu an dinna a nih thu a sawi.

MEOU President chuan, hnam dang khawl, Mizorama dan loa thawkte chu 'The Mizoram Gazette Guidelines for the Enforcement of the Inner Line Regulation in Mizoram' in a sawi angin, trade licence nei loin Mizoramah hna an thawk ngawt thei lo tih a sawi a, "Hun tiam chhunga inla chhuak lote lakah MEOU chuan CYMA-te nen a ṭul angin hma kan la zel dawn a ni," a ti.

JCB registraton tihna atan Rs. 8,000 vel chawi a ngaih laiin, hnam dangte JCB registration tihna atan District Transport Officer (DTO) ṭhenkhatin Rs. 27,000 vel chawitirin registration an tihsak ṭhin tih sawiin Lalmuansiamkima chuan, "Mizorama voter ID nei miah lote'n Mizoram registration an nei ṭhin hi ram leh hnam tan a him lo hle a ni," a ti a, dan loa thil titu DTO-te chu sorkarin chhui chhuakin hrem ngei se an duh thu a sawi.

Lalmuansiamkima chuan, Mizo pa, hnam dang JCB lo enkawlsak ṭhin an awm tih sawiin, "Ram leh hnam humhalh a ṭulzia hriain, lo enkawlsak tawh lo turin kan ngen nghal a ni," a ti.

MEOU hruaitute chuan, dan ang taka construction company tender chhánga Mizoram sorkarin a hriatpuite pawhin an company JCB/excavator ni lo an hman ṭhin chu titawp se an duh thu sawiin, "Mizoram chhunga construction company zawng zawngte koh khawmin, 40% tal ram leilung fate khawl hmang ve turin kan ngen dawn a ni," an ti a; company-in an company kháwl an hman chu an sawisel loh thu an sawi a ni.

Copy : Vanglaini.org