MZP-in ramri chingfel tura hmalak zel an rél

MZP-in ramri chingfel tura hmalak zel an rél

Mizo Zirlai Pawl (MZP) chuan nimin khan Saitualah Assembly vawi 63-na hman chhunzawmin, Saitual College auditorium-ah rorel inkhawm an nei a; Mizoram leh Assam ramri chinfel a nih theih nana hmalak chhunzawm an rel bakah, all India civil service leh central service-ah Mizo tam zawk an luh theih nan nasa zawka hmalak an rel.

MZP rorel inkhawm hi president L Ramdinliana Renthlei-in a kaihruai a, chawhmaah zawh a ni. Chawhnuah vantlang inkhawm neih niin Home secretary Lalnunmawia Chuaungo-in a hmanpui. Zanah vantlang inkhawm an nei leh a, MZP adviser C Lalrokhuma'n thupui a sawi.

Lalnunmawia Chuaungo chuan, MZP inkhawmpui thupui - 'Mizo zirlaite - Kan ram leh hnam tan' tih chu pawimawh tak a nih thu sawiin, "Nakina ram hruaitu te, hna sang tak tak chelhte in la ni dawn a, chuta tan chuan tumruhna leh tghawhrimna a pawimawh em em. Tun hma chuan mahni inchâwm chawpin lehkha kan zir ṭhin a, lehkhathiam tak tak, nihna sang tak takte kan chelh thei; tunah chuan zirlaite mahnia inchâwm leh harsa em ema lehkha zir an awm ta mang lo, full time-in lehkha in zir thei tawh a, in tum phawt chuan in duh duh in ni thei a ni," a ti.

MZP president L Ramdinliana Renthlei pawhin thu sawiin, "Zirlaite'n politics kan ngaihven a hun tawh khawp mai. Kan ram leh hnam siamṭha tur hian theihtawp kan chhuah a ngai a ni," a ti a; Mizo zirlaite chu ram leh hnam tan ke pên zel turin a sáwm.

MZP Assembly rorelte

1.Mizoram leh Assam ramri chinfel a nih theih nan MZP-in hma a lak mek hi chak lehzual a chhunzawm a nih theih nan MZP-in hma la rawh se.

2.Mizoram ramri hrûlah police force ṭhahnem zawk dah a nih theih nan hmalak ni rawh se.

3.Mizorama CCE kalpui mek hi ennawna siamṭhat a nih theih nan hmalak ni rawh se.

4.Mizorama zirtirtu awardee (state/national) kan neihte hi state danga hamṭhatna an neih ang Mizoram sorkarin a pek ve theih nan hmalak ni rawh se.

5.Mizo zirlaite'n ṭawng hman dik leh lehkhabu chhiar tun aia kan uar lehzual theih nan hmalak ni rawh se.

6.All India civil service leh central service-ah Mizo ṭhahnem zawk kan tlin theih nan MZP-in nasa lehzualin hma la rawh se.

7.Mizo zirlaite'n kan hnam thuam uar lehzuala kan inbel theih nan hmalak ni rawh se.

Copy Vanglaini.org