Kolasib All NGO Coordination Committee-in Kolasib district election officer (DEO) Dr Arun T-a'n Tripura relief camp-a Bru-te Mizoram electoral roll-a a thun vanga public interest litigation (PIL) an thehluh chu nimin khan Gauhati High Court, Aizawl Bench-in a ngaihtuah a; Election Commission of India (ECI) chu document an neih ang angte ni hnih chhunga Court-a thehlut turin a hriattir.
Dr Arun T hian Tripura relief camp-a Bru electoral roll-a luh dil mi 471 zinga 218 chu electoral roll-ah a thun thar a ni. Mi 471-te chu hearing-ah an inlan loh avangin ERO leh AERO-te'n an lo hnâwl tawh a, mahse, Dr Arun T chuan hearing nei lo leh document mumal hmang loin electoral roll-ah mi 218 chu a thun leh niin Kolasib NGO-te chuan an ngai.
Gauhati High Court chuan, Kolasib NGO-te PIL thehluh chu November 14 khan ngaihtuahin, Dr Arun T chu nimina insawifiah turin a ko. Court-ah hian Kolasib NGO aiawhin an ukil H Lalṭanpuia, K Lalrinliana leh Lalbiaknunga te an inlan a, Dr Arun T pawh a ukilte nen an inlan a ni. Court chuan ECI chu ni hnih chhunga an document neih ang angte thehlut turin a hriattir a, chumi hnuah PIL hi ngaihtuah leh a ni ang.
No comments:
Post a Comment